Friday, December 1

كروموسوم الزيطه


الانسان العادى عنده 46 كروموسوم في كل خليه جسيميه و بيقولك ان الكروموسوم دا بيحتوى على الصفات الوراثيه للانسان الظاهر و الله اعلم اننا عندنا كروموسوم زياده عن باقى البشر قصدى يعنى كروموسوم الزيطه ,بدأت اخد بالى من الموضوع دا من 7 او 8 سنين كان فى ماركت فتح فى مصر اسمه سينسيبرى قالك ايه يا سيدى ان الماركت دا بتاع واحد يهودى انجليزى المهم قامت الدنيا و ماقعدتش الا لما اتخرب و نص مدارس القاهره ضربت المحلات بجميع انواع الطوب و طبعا من غير ماحد يتاكد اذا كان الكلام دا صح ولا لا

لو حصل ورماك حظك الاسود فى اى فصل فى مدرسه او محاضره فى جامعه و مثلا المدرس او الدكتور قال حاجه تضحك او نكته علشان يخفف جو المحاضره بيفتح على نفسه فتحه منيله بنيله تلاقى معظم الموجوديين بيتريقوا او يضحكوا بصوت عالى و تسمع كلام ممكن تخش بيه مسابقه فى الكلام الاهبل دا غير لو حد وهو داخل قال سلام عليكم او حد عطس مثلا تبقى ميغه


الحورات ال حصلت فى وسط البلد سواء السنه دى او السنه الى فاتت او السنه الى قبلها او من كام سنه ابلغ دليل على اننا شعب زياط


اى واحده تمسك فى واحد تقول دا بيعاكسنى او تقولوا يا قليييييل الاااااااادب تلاقى بشر ملمومه على الواد مع انه ممكن يكون مكلمهاش او هى فهمت غلط


اكتر حاجه تدل على الزيطه عندنا لو مسكوا حرامى و الله بيصعب عليه من البيحصلوا انا عندى اقطعلوا اديه اهون من الشلالييت ال بيخودها


عارفيين لو بنزيط على حاجه فيها فايده كان دا مابقاش حالنا و ربنا مفيش اكرم منه
Post a Comment