Wednesday, March 21

تحيا التعديلات الدستورية و تسقط العنصرية و انا بحب المهلبية



لقد تفضل جلالة الرئيس محمد حسنى مبارك بتقديم تعديلات على الدستور المصرى

انا مش فاهم المعارضة زعلانة من ايه دلوقتى مش هم على طول بينادوا بالتعديلات

و عملوا مظاهرات و اضربوا و اتحجزوا فى الاقسام

يا جماعه يا ريت مش عايزين نكدر الصفو العام للبلاد

ايه يعنى لما تتيح التعديلات الدستورية الجديدة عدم اشتراط قضاء الخدمة العسكرية لمنصب رئيس البلاد مش احنا مش عايزين ظباط يمسكوا البلد

ايه المشكله ان التعديلات الدستورية الجديدة لاتحدد دين رئيس الدولة بالرغم من ان الدين الرسمى للدولة هو الاسلام مش ممكن يطلع واحد مصرى بعد كام سنة يكون بيعبد بوذا مثلا و يعمل بوذا بار فى كل مدينة مصرية زى اللى فى شرم



ايه المشكله ان التعديلات الدستورية الجديدة لا تتيح اشراف القضاة على الانتخابات ما كفاية على القضاة فلوس القضايا اللى بياخدوها خلى الموظفيين اللى مش لاقيين ياكلوا هم اللى يشرفوا على الاقل الواحد بياخد على الصندوق مبلغ و قدرة


ايه المشكله ان التعديلات الدستورية الجديدة لا تتيح قيام احزاب على اساس دينى مهو الاخوان عملين جماعة هى صحيح محظورة و كل لما الحكومة تحتاج فلوس تقبض على شوية رجال اعمال منهم بس فى الاخر شغليين زى الفل



نيجى بقى للنقطة اللى بينت عنصرية المعارضة

ايه المشكله ان التعديلات الدستورية الجديدة لا تمنع
مزدوجي الجنسية من ترشيح أنفسهم للرئاسة , عادل حمودة كتب فى الفجر بيقول ان رئيس الموساد ممكن ان يصبح رئيس لمصر , ايه المشكله يعنى لما واحد اسرائيلى يمسك حكم مصر

هى حبكت يعنى على منصب رئيس الدولة

مهو الاسرائليين بيخشو سيناء بالبطاقة

مهو الاسرائليين بيخدوا مننا غاز

مهو الاسرائليين بيزرعوا أرضنا

مهو الاسرائليين بيقتلوا العساكر على الحدود و احنا بنخليهم يعملوا تحقيق داخلى

مهو صادرات الاسرائليين فى تزايد مستمربواقع اتفاقية الكويز

يعنى مش فارقة ان يكون رئيس البلد أسرائيلى احنا تقريبا عايشين مع بعض و يا ريت المعارضة تبطل حقد على الناس و تفهم ان الحزب الوطنى فاهم كل حاجة و هو عارف مصلحتنا اكتر مننا

كان معاكم احمد اتش من جمهورية انتيكا الشعبية المهلبية
Post a Comment