Tuesday, April 17

شباب لبسوا الترتر


على طريقة ماجدة زكى و هى بتنده على عادل أمام فى فيلم الارهاب و الكباب يــــــــــــــــــا أحـــــــــــمـــــــــــــــد لاقيت اختى الصغيرة بتنده على و بتقولى تعالى بيعلنوا عن ميستر ايجيبت روحت قدام التيفى و انا مش فاهم مين راح فين وكانت الفاجعة لاقيت شباب زى الفل بيقدموا نفسهم فى ما يعرف بمسابقة ميستر ايجيبت طبعا طلع منى لفظ مش لذيذ و افتكرت ايام عبد الناصر الله يرحمه كان راجل حصل حاجة اسمها مسابقة شاب الشاطئ و فيها بيختاروا اجمل شاب على الشاطئ و اظن انها كانت فى ميامى او حاجة زى كدا عبد الناصر لما عرف لم كل الشباب الحلو و بعتهم ياخدوا فترة تدريب فى الجيش


**********************************

اخر مرة كنت اشتريت اى هدوم كانت من فترة المهم قلت انزل اشترى تيشيرت علشان الصيف داخل علينا ,انا بعشق اللبس الكاجوال لدرجة انى كنت بتخيل انى عمرىماحلبس قميص فى حياتى و كنت بعمل تصميمات تيشرتات و انا فى ثانوية عامة , المهم روحت نازل على محلات جمب البيت عندى و بدأت اتفرج و دخلت المحل و رميت السلام


ازيك يا حودة ايه اخبار التيشرتات عندك

باشـــــا دا انا لسة جايلى شوية تيشرتات جامدة اخر حاجة

و فضل يقلب فى تيشرتات متعلقة بس التيشرتات كلها عليها خرز و ترتر و اكسيسوريز حريمى

انت اشتغلت فى الحريمى امتى

دا رجالى

رجالك ازاى انت اتهبلت عايزنى البس تيشرت عليه ترتر

يا عم هو انت لوحدك ماشباب كله بقى يلبس

حلاوتك انت انحرفت ولاايه

مش قصدى حاجة بس السوق عايز كدا

متجيب تيشرتات تتلبس على المسا خلينى اروح

مفيش غير دا و كل اللى فى السوق كدا

خرجت من المحل و انا بسب و بلعن فيه و فى التيشرتات و فى الترتر و بعد جولة استمرت اكثر من 9 ساعات فى شوارع ومولات و حوارى و فنادق العاصمة فى محاولة منى لتفادى الترتر لدرجة انى لما كنت بدخل محل كنت بسأل الراجل عندك حاجة من غير ترتر و تقريبا كانت معظم الاجابات بالنفى ماعدا واحد بصراحة كان معلق كريستال زى بتاع النجف فى القمصان المهم علشان محيصليش حاجة فى دماغى اشتريت تيشرتين بالعافية من غير ترتر , احلى حاجة و انا راجع سواق التاكسى شاب عندة 27 سنة لاقى معايا شنط لبس راح فتح معايا موضوع الموضة الشبابية و فضلت اسمعلة طول الطريق وحسيت ان الامل فى الطبقة الشعبية البسيطه الى متلوثتش افكارها بحالة الدعارةالفكرية اللى بنعيشها دلوقتى و فضلت احمد ربنا ان البلد لسه فيها رجاله و فى وسط حالة السعادة الغامرة اللى نزلت علي لاقيتة
بيقولى عارف يا ابو الشباب انا نزلت وسط البلد ا ول امبارح و اشتريت قميص بس عدالة كله بيلمع بمية وعشرة كنت خلاص وصلت البيت نزلت من العربية و ان بسب فى القميص و فى الترتر ووسط البلد و بقول ربنا يعوض على الرجالة
Post a Comment