Tuesday, May 1

تحياتى

بينما اطالع تعليقات البعض على موضوعاتى اجدهم يلقون على بالكلمة تحياتى و فى بعض الاحيان أختم بها كلماتى غير مكترث بمدى أتفاقها أو أختلافها مع ما كتبته قبلها و أثناء صلاتى حين أفرغ من سجودى و اعتدل فى جلستى لقول شهادتى استفتحها بكلمة التحياتى أذا فالكلمة بمعناها قدير فى مكمنه غيرمعلن فى مظهره فاعتصرت الكلمة أفكارى و أعتطنى المساحة الكافية لبعض الفزلكة فأسمحوا لى ببعض منها

تحياتى

تحياتى لشبرا و دار السلام واول فيصل و نصر المدينة
تحياتى لوسط البلد و البورصة وقهوة الحرامى وكشك ام مينا
تحياتى من مصر الجديدة الى حلوان مرورا بالمعادى
تحياتى يا ركن يا بعيد يا هادى


تحياتى لليالى أسكندرية و نسمتها العفية و الصحبة الشقية
تحياتى للبحر فى فجرها و المشى فى رملها والعشق لجوها


تحياتى لعم محمد البقال و كامل السمكرى و عبدة الشيال
تحياتى للجنينى الفلاح و مصطفى الطباخ و الراجل اللى كان بيجيب العيش كل صباح
تحياتى لصاحبى بياع الجرايد و طه بياع الفول المتين اللى تاكلة و تحلف يمين انه أطعم من كفتة الحاتى و تقفله انتباة وتقولوا تحياتى


تحياتى للفول و الطعمية والكشرى ابو تقلية
تحياتى لطاجن العكاوى التقيل اللى تاكله و تميل و تنام فى السرير
تحياتى للفول على العربية و ظبطلى واحد فول حار ويزاوت طحينة بس من العينة المتينة
تحياتى للجمبري و سعرة المفترى بس من الاخرمفعوله جوهرى



تحياتى للعود و الكمنجة و عم الالاتى
تحياتى لمزيكة فرنسا وطبلة اوغندا ورقصة بلادى
تحياتى لكامليا جبران و فتحى سلامه و بلاها الاغانى اللى مش فهمانه


تحياتى للنظام فى بلدنا و المرور فى شوارعها و الطايرات بتيجى فى ميعادها
تحياتى لمشروع كمبيوتر لكل مواطن وفيلا لكل مسئول و جوينت حشيش لكل مسطول
تحياتى لزنقة المترو وزنقة الاتوبيس و زنقة الستات
تحياتى للواسطة و المحسوبية والرشوة العادية و الجنسية
تحياتى للحسنة المخفية فى درج المسئول علشان تعدى العملية
تحياتى للصحة فى بلدنا و المستشيفات شغالة و بتزود اوجعنا


تحياتى لحامى بلدنا و زى ماقالوا اخترناك بس اخترناك غصبن عنا يأخى أرحل و حل عن سما اهلينا دا احنا اللى فينا مكفينا ورضينا بالهم و الهم بيقتل فينا
تحياتى للحزب الحاكم و الحزب النايم و الحزب القايم
تحياتى للمعتقلين السياسيين اللى متخديين زور و هم محترمين
تحياتى لتفصيل الدستور و اللى يقول غير كدا يبقى طرطور
تحياتى لصحافتنا الحرة اللى فى بلدنا بقيت غرة
تحياتى للجرايد الحكومية اللى مكانها عندى فى النملية


تحياتى لكتابى و ورقى و استيكتى ومسطرتى و قلمى الباركر الغالى اللى عمرى ماكتبت بيه حاجة على بالى
تحياتى لبارفانى وساعتى و عربيتى المهكعة جزمتى المقطعة هى صحيح مقطوعة من تحت بس محدش واخد بالوا واللى حايخد بالو حديهالو


تحياتى يا صاحبى يا غالى
تحياتى يا صاحب الضحكة البسيطة
تحياتى يا صاحب النظرة العميقة
تحياتى يا صاحب صحبة وقت الضيقة
تحياتى يا خويا يابويا يا ابن عمى وقت ما الغريب يمص دمى


تحياتى للى علمنى دينى و حببنى فى دين غيرى
تحياتى و صلاتى لرسولى محمد مبشر السلام وخير الانام
تحياتى لأصل التسامح عيسى بن مريم عليه السلام
تحياتى لبن الخطاب الفاروق عمر معز الاسلام


تحياتى للحورالمنتظريين مماتى
تحياتى لكم أستغفروا لى عسى الله ان يغفرذللاتى
تحياتى لا تحزنوا لانى أنتظر تتويج أميرة على عرش قلبى يوم زفافى
تحياتى لها فانى أنتظرها ان تفتح باب أمامى


تحياتى يا من عشقت هواكى
تحياتى يا من سرقتى حياتى
تحياتى لكى يا من ملكت على ذاتى
تحياتى يا من بحت لها بسر عذابى
تحياتى يا من نظرت اليكى فتملكنى الاسر من عيناكى



تحياتى الى كل ماهو أتى
تحياتى و انا فى انتظار مماتى عشت كثيرا او قليلا فكلها لحظات فى عمر خلودى فى جنتك فعساك ربى ان تدخلنى رحمتك فأدعوا لى يا من قرات كلماتى ومنى اليك تحياتى

Post a Comment