Tuesday, June 5

من هارفارد لكايرو يا قلبى لازم تحزن




قاعد بتفرج على الاخبار على النت و جات عينى على غير العادة على موقع اخبار تكنولوجى و كان الخبر الرائع ان جامعة هارفارد الامريكية حتسجل اكتر من 50 براة أختراع للنانو تكنولوجى و سندت بدماغى على الكرسى و افتكرت من حوالى 5 شهور لما العالم المصرى محمد النشائى نزل مصر و اقترح اننا نفتح جامعات متخصصة فى النانو تكنولوجى لان الفرق بينا و بين اكتر الدول العاملة فيه مش اكتر من 10 سنين ودا كان حيخلينا من أوائل الدول فى مجال الصناعة لو بدأنا نشتغل فيه و طبعا الراجل نبح صوتة و كلف نفسة تذاكر طيران على الفاضى لان كالعادة لازم محدش يسمعة احنا لازم نستنى لما تكون الفجوة العلمية بينا و بين النانو 10000 سنة علشان نبداء نفكر ازاى نستوردها من برة ومين اللى حيسمعة اساسا الحكومة ولا مراكز البحث العلمى و لا وزارة البحث العلمى ولا الدكاترة فى الجامعات اكيد محدش من الناس مهتم بالكلام دا لان الحكومة بتستهلك كل مواردها تقريبا للبقاء فى السلطة و مراكز البحث العلمى عاملة زى دواوين الحكومة و فى ابحاث علمية اترمت فى الادراج كانت ممكن توفر على البلد دى مليارات بس علشان البيزنيس له حسابات تانية لازم تفضل فى الادراج و نيجى بقى لوزارة البحث العلمى اللى بصراحة مش عارف ايه لازمتها و اساسا مش عارف اذا كان عندنا بحث علمى فى مصر ولا لا لانى على حد علمى من ساعة مافتحت عينى فى البلد دى و احنا بنعمل كل حاجة بالبركة او بالامر المباشر من غير دراسة جدوى ولا نيلة يعنى تحس ان المحافظ او المسئول اللى بيدى الامر المباشر ملوش دعوة الموضوع له لازوم و لا ملوش لازوم هو مال ابونا و احنا مالنا و أكتر حاجة بحبها فى مصر أن كل شئ مستقل بذاتة , و اذا اتكلمنا على الجامعات حنقول ايه ادارة متهالكه و نظام ادارى متخلف زية زى معظم المؤسسات الحكومية و لو رجعنا لأحداث البلطجة اللى حصلت فى جامعة عين شمس حتكتشف ان الاحداث دى استحالة تحصل فى اى دولة محترمة فى العالم!!!!!يعنى من الاخر كأنك يا ابو زيد ما غازيت


ممكن يكون فى أمل ان البلد دى تتعدل بس دا مش حيحصل الا لما نتغير و نعرف احنا مين و عايزين ايه و فعلا نحاول نغير و اعلموا ان الله لا يغير ما بقوما حتى يغيروا ما بأنفسهم
Post a Comment