Saturday, August 18

البعض يذهب للجزار مرة واحدة




كوميديا ساخرة لموظف مصرى عادى جدا بس نفسه ياكل لحمه
أنهاردة أخر, الشهر أنهاردة حقبض المرتب , أنهاردة حشترى لحمة , نطيت من فوق السرير و لبست هدومى فى ثوانى و ركبت جناحات و طيرت على المصلحة وانا كلى أمل فى غد مشرق المهم روحت متجه على الخزينة مباشراً لاقيت الموظفيين كلهم بيشتموا و بيزعقوا اول حاجة جات فى دماغى ان المرتب لسه مجاش و لاقيت حتة اللحمة بطير من دماغى روحت داخل رامى السلام ولاحد عبرنى
ايه يا جدعان ايه اللى حصل بس
بيقولك مش حنقبض من هنا
امال حنقبض منين
من المكنة
مكنة مين يا عم الحاج
راح الموظف بتاع الخزنة قال باأأأأأأأأأأأأأأأأأأأأس سكوت نقول كمان مرة , المرتبات من هنا و رايح حتقبضوها من مكنات الصرف الالى اللى فى الشوارع
الناس كلها فضلت فتحة بقها و محدش فاهم حاجة و بعديين واحد راح طالع و قال
يعنى فى مرتبات انهاردة
ايوة فى مرتبات بس حتقبضوها من الشارع و دلوقتى حنسلمكوا كروت تاخدوا بيها الفلوس من المكن
طيب ما تاخدوها انتو من المكن و بعدين احنا ناخدها منكم
مينفعش علشان البنك حياخد نسبة من الفلوس
و هنا تعالت الاصوات و تطايرت الشتائم فى كل أتجاة و حدثت انا نفسى يا نهار مدوحث دا كدا اكيد اللحمة مش حتدخل بيتنا تانى , و استلمت الكارت بتاعى و نزلت أدور على اى مكنة فى الشارع لغاية لما لاقيت مكنة فى شارع جانبى وطبعا كان واقف قدامها طابور ممكن ينافس برج أيفيل فى طوله وقفت وامرى لله و كانت الساعة لم تتجاوز الثانية عشر ظهرا و مرت الساعات و الايام و السنين و تقريبا الطابور متحركش كتير و ترتيبى كان فى الطابور تقريبا 151 زهقت من كتر الوقفه و روحت خارج و انا بسب و بلعن فى الحكومة و المرتب و فى الطابور و قلت انشالله بكرة الجمعة اصلى الفجر و اطلع على اى مكنة و بلاها لحمة انهاردة و انا راجع بيتنا بصيت لاقيت مكنة زى اللى كنا واقفيين قدمها بس جوه مبنى شيك كدا و فى تكييف جوة و فى واحد بتاع أمن لابس انضف من رئيس المصلحة نفسه روحت داخل هواااااو لاقيت الراجل بتاع الامن قام وقف لما شافنى و قالى تحت أمرك يا فندم تخيلوا !! المهم قلتلوا
انا عايز اخد مرتبى لو سمحت يعنى انا حديكوا الكارت دا و تدونى مرتبى
الراجل كان واضح عليه انه مش فاهم او شكلوا جديد فى الشغلانة لانه بصلى بأستغراب جدا المهم مرضتش احرجة اكتر و قلتله سيبنى انا حاتفاهم مع المكنة و بعدين دخلت و راح التكييف لاسع قفايا و شعرت انى باشا و شكرت المصلحة انهم سمحولى انى اجرب الاختراع العجيب دا و بعدين بصيت على المكنة و فهمتيش اى حاجة و فضلت اكتر من 10 دقايق بحاول اعرف الكارت اللى معايا دا مين حايخده منى وكل دا و الراجل الغلبان بتاع الامن يراقبنى لحد لما دخل و قالى بعد أذنك ممكن الكارت انا حاسعدك
أديتلوا الكارت راح لراجل مسكوا و قالى دا بنك تانى قولتلوا يعنى مفيش مرتب قالى ر فيه بس البنك هنا حايخد نسبة قلتلوا ايوة هما قالولى كدا قالى طيب على كيفك راح مدخل الكارت و فضل يدوس على الشاشة و انا بتفرج علية راح قالى رصيد حضرتك 260 جنية قلتلوا فعلا قالى حضرتك حتسحب اد ايه قلتلوا كله طبعا قالى تحت امرك راح ساحب و مدينى الفلوس باعها وراه لاقيتهم ناقصين 60 جنية قلتلوا حضرتك الفلوس تناقصة قالى انا قلت لحضرتك البنك بياخد نسبة
روحت مصرخ بعلو صوتى يا نهار احمر بياخد 60 جنية الحرامية
خرجت من المكنة و انا بعيط بدل الدموع دم وحلفت انى لازمن و لابد لانى اتغدا لحمه
مشيت من المعادى لفيصل علشان اوفر الربع جنية بتاع الاتوبيس و اتجهت للجزار على طول و رميت السلام و رد عيه
عندك لحمه
لا دا محل بلاي استيشن !!! طبعا عندى لحمه
نيهاهاهاها طيب ال1/8 كيلو بكام
نــــعم يا خويا
حضرتك انا بسأل ال1/8 كيلو بكام
انت مين باعتك تفور دمى على المسا
ياعم انا راجل على اد حالى و نفسى اشم ريحة اللحمة
على اد حالك !! و عايز تاكل لحمه ليه يابنى
اهو مرة كل 6 شهور
يلا انا حاكسب فيك ثواب و حابعلك نص كيلو ب 25 جنيه
يا نهار ابيض يعنى الكيلو ب 50 جنيه
ايوه و لو مش عاجبك ورينى عرض كتافك
لا انا لما صدقت دا انا بحلم بيها من يوم 2 فى الشهر اللى فات
عايزها موزة ولا فلتو ولا رييش ولا ايه
عايزها لحمه
ارحمنى يا رب
الراجل لفلى حتة اللحمة وراح راميها فى وشى و هددنى انى لو روحتلوا تانى حيعلقنى جمب الفخدة هو انا بصراحة مفهمتش الفخدة دى ايه بس هو شاورلى حيعلقنى فين بظبط ,بلعت ريقى و طيران على بيتنا و انا حاضن حتة اللحمه ودخلت البيت وانا حاسس ان فى حد موجود فى الشقة بس قلت دى تهيقات ودخلت المطبخ و انا عمال احدف حتة اللحمه فى الهوا ومرة واحدة لاقيت حد بيقولى اخويــــــا اترعبت طبعا و حتة اللحمه طارت من ايدى كانت اختى عطيات لسه جايه من الصعيد حيث انها عايشه مع جوزها عبد المتعال هناك و بدل ما تاخدنى بالحضن راحت واخده حتة اللحمه وقالتلى لحمه يا ابن الايه انت سرقت مين وراحت صرخة زى طرزان لحمه يا عيااااااااااااال و فجاه لاقيت العيال بيجرو من اودة النوم و شلونى فى النص زى الموجه فى البحر وهكذا استطعت بعد شد وجذب و خناق و صويت و ذعيق انى اظفر بحتة لحمه لا يتجاوز حجمها حجم المعلقة بملمترات معدودة و 6 معالق شوربة وهكذا اقسمت الا ادوق اللحمه مرة اخرى الا فى الجنه

حد يعرف اللحمه فى الجنه بكام يا جدعان ؟


------------------------------------
رجاء لا تضحك فهذا واقع
Post a Comment