Wednesday, October 24

أنها حقا دولة ديمقراطية





فى لحظات كثيرة اتأمل ذلك الصراع للوصول للسلطة من قِبل جميع القوى السياسية فى مختلف أنحاء العالم من اليسار و اليمين واِسلاميين و شيوعيين و ليبراليين و حاجات كتير كدا ملهاش لازمة ,و حاولت افكر احنا فين بقى من كل دا لاقيت اننا ندعى اننا دولة ديمقراطية !! انا كنت فاهم ان الديمقراطية هى احترام الرأى الاخر ! بصيت بقى على الحال عندنا لاقيت الحكومة بتعتقل الاخوان المسلمين و بتسحل الشيوعيين و بتزور تهم للليبراليين و محدش عارفلها يسار من يمين اذا الديمقرطية هى ليست أحترام الرأى الاخر كما يدعى بعض المغرضين وقلت أبحث عن الديمقراطية على الانترنت لعل و عسى !! ,كتبت كلمة الديمقراطية على جوجل و عملت بحث و جاء تعريف الديموقراطية فى نقاط

· التحكم بقرارات الحكومة حول السياسات العامة يعهد به بموجب الدستور إلى ممثلين منتخبين عن الشعب.
طبعا احنا و الحمدلله القرار بتاعنا بيجى من فوق !! و الدستور بيتعدل برضه من فوق يعنى زيتنا فى دستورنا
· يتم انتخاب ممثلي الشعب في انتخابات دورية وعادلة.
فعلا الانتخبات عندنا دورية و بس
· يمارس ممثلو الشعب المنتخبون سلطاتهم الدستورية دون مواجهة معارضة تعلو على هذه السلطات من قبل مسؤولين غير منتخبين.
لا احنا هنا مظبطين مع بعض و كله منفد على كله
· يحق لجميع البالغين التصويت في الإنتخابات.
البالغين بس !! دا احنا كمان عندنا الميتين بيصوتوا فى الانتخابات
· يحق لجميع البالغين ترشيح أنفسهم لتولي مناصب عامة.
مش للدرجة دى بقى !!
· يحق للمواطنين التعبير عن رأيهم فيما يتعلق بالشؤون السياسية دون خطر تعرضهم للعقاب من قبل الدولة.
هاهاهاهاهاهاها
· يحق للمواطنين السعي لإيجاد مصادر أخرى للمعلومات، كوسائل الإعلام الإخبارية، ومثل هذه المصادر يحميها القانون.
فى عندنا نوعين من وسائل الاعلام نوع بيحميه النظام و النوع التانى ياخد فوق دماغ اهلة
· للمواطنين حق تشكيل مؤسسات وهيئات مستقلة، بما في ذلك أحزاب سياسية وجماعات مهتمة مستقلة.
الحمدلله دا كمان عندنا بس رئيس اللجنة اللى بتختار مسئول فى الحزب الحاكم
· الحكومة تتمتع بالحكم الذاتي وباستطاعتها العمل بشكل مستقل خارج أي إكراه خارجي .
انا دلوقتى عرفت تصريحات وزارة الخارجية بتيجى منين

أذا أنها حقا دولة ديمقراطية
Post a Comment