Monday, November 12

ازاى نتحدى الملل

الطريقة االى حقولها دى طريقة جديدة و لم تستخدم من قبل !!!! احنا ننزل مثلا حوالى 1000 شحات فى مختلف ربوع المحروسة ( واحد ابن حلال يسألنى و يقولى مين المحروسة اقوله المهندسين !! ) و عن طريق ايراد يوم واحد بس من الشحاتين دول حنقدر نلم اكتر من 400 الف جنية مصرى ( دى حقيقة علمية لان ايراد اصغر شحات بيدخله فى ال400 جنية فى اليوم ) نروح بقى ندفع 200 الف ترخيص قناة على اى قمر صناعى !! يكون بيبث فى الشرق الاوسط و طبعا اول لما مسؤلين القمر الصناعى يعرفوا انها قناة حتعرض افلام استربتيز على شكل كليبات اغانى ممكن ناخد التراخيص من غير ما ندفع ولا نكلة و نوفر ال200 الف بتوع التراخيص علشان ندفعهم رشاوى للرقابة علشان ترضى تعرض الافلام الاسترتيز اللى حنعرضها على القناة و بعديين نجيب اى عيل (صغير ) و دا حيشتغل فكهانى و طول النهار و الليل يفضل يقو ل العنب العنب العنب و مفيش مانع بعد فترة نخليه يقلب و يقول البلح البلح البلح !!!! و ياريت مننساش شلة المساطيل و الشمامين اللى معاه علشان ميبقاش واقف لوحده !! و هو بيبيع الفاكهةو بعديين نعرض على اى راقصة اننا ننتجلها فيلم صغير !! اقصد كليب صغير تبين فيه( مواهبها) علشان سعرها يضرب فى السما و مش عايزيين ننسى حبايبنا الحلويين ودول حنوفرلهم شباب زى الفل ولازم يكونوا فاتحيين زراير القمصان لحد البناطيل !! دا شرط اساسى !!و ياحبذا ( اوكى انا مش عارف يعنى ايه حبذا بس هى شكلها حلو فى الكلام) و يا حبذا بقى لو كان عندنا واد شبة البرميل كدا نلبسة اصفر فى اصفر على اساس انه عنده الحصبة مثلا و بعديين الواد يكون مهمته ان يطلع ترباتيت ام المشاهديين و انشالله بسببه نقفل القناة و دا فقرتة حتكون على شكل كليب صغير مدتة لا تتعدى الدقيقة الواحدة او دقيقتين و يكون الهدف المعلن من الفقرة انتقاض سلبيات المجتمع بس احنا بقى نحاول السخرية من رموز حقيقية موجودة فى المجتمع و عايشة بينا !!! و بعد فترة لما الناس تبداء تزهق مننا نخبط بقى خبطتنا الجامدة و نجيب اى (واحدة )مش مشكلة منين !! اصلهم بقوا كتير اوى و برضه نلبسها اصفر فى اصفر على اساسا انه زى رسمى !!! و دى مهمتها حتكون جمع فئة الشباب ( التعبان ) حول القناة عن طريق الكشف عن ( مواهبها المكبوتة ) و طبعا فى اى كليب منهم نركز اوى على مواهبها علشان اللى مخدش بالو ياخد يركز و ياخد بالوا !!! و حاجات تانية كتير ممكن نعملها و نضحك الناس على نفسهم ونتريق عليهم و نشجع على الفجور و العرى ( اللى هو يعنى محدش يلبس هدوم ) و بعديين كلنا نمشى فى الشارع بلابيص ( دى برضة من غير هدوم بس بالعامية ) وهنا ترتفع نسبة التحرشات و بالتالى يزيد الدخل القومى و نجذب الاستثمارات الخارجية و البورصة تنتعش و مستوى دخل المواطن يرتفع و الحياة تبقى زى الفل و نفتح قناة تانية و تالته و رابعه و الشباب تزيد هايفتة و يلبس تيشرتات كلها ترتر و كل الناس تسقط البناطيل و الحشيش يبقى هو اللى بيجمعنا و البطالة متبقاش مشكلة لان الشاب مرزوع على القهوة 27 ساعة فى ال 24 ساعة و هو يعنى حيشتغل ليه ماهو على القهوة تمام و زى الفل و اساسا حيشتغل ازاى اذا كان الشغل محتاج ياخد كورسات بأرقام مبيسمعش عنها الا فى الافلام و هو يعنى لما يشتغل و يتجوز مراتة حتطلع زى هيفاء و لا انوش أكيد لا !!! يبقى الحل الوحيد انه يظبط نفسة هنا و يشتغل كام شغلنة على اد حالة و منها يجيب فلوس للكيف و الباقى يحوشة علشان يشترى الفيزا المضروبة بتاعت أيطاليا و بعدين يطلع على الابيض المتوسط و هو راكب تابوت على شكل مركب و معاه يجى 150 شاب برضه كانوا بيتفرجوا على القناة بتاعتنا و عايزيين كلهم يتجوزو واحد زى هيفاء و لازم يغرق التابوت اللى على شكل مركب و يغرق معاه 130 شاب و الباقى بعد ما يترحلوا حيكون قدمهم حلين اما انهم يراجعوا نفسهم و ربنا يهديهم او يقعدوا على نفس القهوة و يتفرجوا على الكليب الجديد بتاع هيفاء و الكليب الجديد بتاع البنت ايها بتاعت المواهب المكبوتة و نفضل ندور فى نفس الدايرة الى ما يشاء الله

دى فكرة ممتازة علشان نتحدى الملل بس المشكلة الوحيدة ان كل دى حقايق بل بلعكس ان حاولت على اد ما اقدر انى استخدم الفاظ مهذبة لوصف افعال غير مهذبة !! و اظن ان فكرتى وصلت !!! كل اللى بأطلبوا منكم انكم على الاقل بينكم و بين نفسكم ارفضوا ان يكون هو دا السائد و ننسى اننا كنا فى يوم من الايام نصدر الاخلاق و القيم و التحضر الى العالم !! فأصبحنا نستورد الفجر و الفسوق و أقذر ما يتم عرضه على شاشات الاخريين ظنا منا اننا نجارى الاخريين فلم نكسب الا احتقارنا لانفسنا و حالة من الانفصام يعيشها اجيال صاعدة و حالة من الحزن يعيشه اجيال راحلة على زمن كان به بعض الاحترام


أسف اذا اصابكم بعض الملل فهو الاحساس السائد الان
Post a Comment