Wednesday, March 19

أضغاث احلام



رجعت من بره تعبان و اترمت على أقرب كرسى و ندهت على صديقى أبو نسمة أطالبه بالغداء أنهاردة الدور عليه فى تحضيرة و غمضت عينى على امل الحصول على نوما سريع و لاقيت نفسى جوه حلم كل حاجه لونها أسود و لاقيت ناس قاعده بتزعق و ناس بتشد شعر بعض و حاله من الهرج و المرج روحت رايح ناحيتهم لاقيت ناس غريبه و كوكتيل غريب من البشر استطاع عقلى الباطن ان يجمعهم مع بعض و على ما اتذكر لاقيت توفيق الحكيم و احمد شوبير و احمد زويل بيتفرجوا على عمرو أديب و هو بيقدم طبق اليوم والواد القهوجى اللى فى قهوة ساقية مكى و أنيس منصور و مستر أحمد بتاع الانجليزى بتاع خمسه ابتدائى واقفين بيتكلموا مع أينشتاين و أول حب فى حياتى و الكابتن بتاع الكونجفو اللى كسرلى اسنانى و انا صغير بيلفوا التراك و واحد صاحبى مشفتوش من زمان و الشيخ الشعراوى واقفين بيتكلموا مع أبن خالتى و الكابتن ماجد قاعد مع مازينجر بيلعبوا طاوله و عمرو خالد قاعد بيلعب تنس مع فريدير و السادات واقف بيشرح لتوت عنخ أمون أزاى عبر القناه و شوية شباب من كفاية واقفين بيلعبوا فاتحى يا وردة و ظابط امن دوله مربى دقنه واقف بيصورهم و و احد اخوانى مش مربى دقنه واقف بيصور الظابط و أبراهيم عيسى فارش جرنال حكومى على الارض علشان يقعد مع ألبير كامى ونور الشريف اللى كان بيقول يا جماعة انا اسمى الحقيقى جابر !! و دريد لحام واقف فى الشباك و بيقول " و من الشباك لارميلك حالى " و راح داخل أحمد نظيف و ماسك فى ايده طبق فول كبير و فى ثانية هجمت الناس كلها على الطبق وأولهم أينشتاين و أكل اللى يكفيه وبعدين طلع قعد يتكلم مع الحمار اللى كان ركبوا محمود السعدنى لحد لما خبطت فى دماغة الكرة البلاستيك اللى كان بيلعب بيها أحمد عز مع نجيب سويرس و الاسكندر الاكبر واقف مستنى الميكروباص و بيجى الميكروباص و جمال مبارك هو اللى بيسوقه و ماسك ميكروفون و بيقول انا مش عايز أحكم و احمد زكى بدر بيقول انا مش عايز اكون وزير و فهمى هويدى أخد الكرة البلاستيك و راح مبيصيها ل أحمد فواد نجم اللى شتم كل الموجودين و مسك فى خناق جمال علشان الميكروباص بيطلع دخان و احمد فتحى سرور واقف بيتكلم فرنساوى مع سامح بتاع الانابيب وعبد الوهاب الميسيرى بيشترى ورد علشان يزور اينشتاين فى الحميات و أسلام نبية ماسك عصاية "غليظة"و بيجرى ورا ثلاث وزراء و محمد حسين هيكل لابس بدلة سودا و رايح يعزى فى سعد زغلول و ساركوزى واقف بيطلع لسانه للجميع وأحمد أبو الغيط واقف بيخطب فى مخلوقات فضائية و تامر حسنى بيشجع مصر .....يـــــــــــــــــــــــــــا أحـــــــــــــــــــــمــــــــــــــــــــــــد !! كان صديقى يحاول ان يوقيظنى منذ ربع ساعة و انا مستغرق فى نوم عميق قبل ان أجيبه فى أنزعاج شديد معلش ياأبو نسمة أضغاث أحلام

____________________

مدونة جديدة رائعة
kokoletta

Post a Comment