Monday, November 17

أسئله غير منطقيه تخصنى فقط


ليه وحيد سيف بيهوهو و هو بيمثل

ليه جوز عمتى بيضحك لما وحيد سيف بيهوهو

ليه الهارديسك بتاعى ضرب لما وصلتله الباكب ديسك من اسبوع و كل شغلى راح

ليه كل مايجى اعلان عربيتى فى الراديو العربيه تتخبط

ليه الفول الاسكندرانى بيحطوا عليه صلصله مع ان فى فول بالصلصه

ليه معجون السنان بيخلص على طول

ليه مبقاش فيه ريبسوس زى زمان

ليه جمال مبارك

ليه الطعميه فى اسكندريه اسمها فلافل

ليه الدنيا بتكون برد فى الشتا

ليه مابنسمعش اغنية المصريين اهما الا على القناة الاولى المصريه بس

ليه هانى شاكر لسه بيغنى

ليه لازم اتجوز

ليه بحب الصحرا

ليه رقم 13 نحس

ليه القطط بتنونو مش بتهوهو زى وحيد سيف

ليه ايطاليا كسبت كأس العالم اللى فات مع ان فرنسا لعبت احسن منهم

ليه اسامه سمير بيتسهوك و هو بيتكلم فى الراديو

ليه عمرو اديب زملكاوى مش اسمعلاوى

ليه الستات بتحب النكد

ليه القطط بتاكل و تنكر

ليه الكلمه الفرنسيه الوحيده اللى بيستخدمها كل المصريين هى اسنسير

ليه الناس بتحشر مناخيرها فى اللى مالهاش فيه

ليه العربيه بأربع عجلات

ليه لو عايز نوكيا تروح لرايا

ليه الجبنه ام فلفل اسمها فيتا

ليه ماسيبش مصر و اهاجر

ليه السودان مافيهاش برج القاهره

ليه سواق الميكروباص لازم يكون بيشتم

ليه بيشغلوا نفس المزيكا الغبيه بتاعت الانتظار لما تتصل بأى شركه فى العالم

ليه المصريين هم الشعب الوحيد فى العالم اللى بيعدوا الشارع و الاشاره حمرا

ليه السناره اسمها سناره

ليه بورسعيد مفيهاش مترو

ليه المهندسين مليانه شحاتين

ليه فيه عرب كتير فى شارع جامعة الدول

ليه ماندو ماشفش فيلم بريف هارت لحد دلوقتى

ليه فيه لون بندقى و مافيش لون فذدقى

ليه الزهريه اللى فوق الكومودو مفيهاش ورد

ليه كومودو مش كومودينو

ليه بتقرا الكلام دا مع انه مايخصش حد الا انا

ليه بنكتب على ورق مسطر مش مدور

ليه الورد مليان شوك

ليه احمد حلمى اتجوز منى زكى مع ان عايده بتحبه

ليه بيتهوفن مش الريس متقال

ليه الفيسبوك مش وش الكتاب

ليه عمر كان بيقول لفاتن يا بطاطس فى صراع الوادى

ليه بعشق صوت الكمنجه

ليه مناخير مش مراخير

ليه امريكا مش دبى

ليه الارض كروية تدور حول نفسها

ليه جينفر سابت بن

ليه يوم الأربع مش الأتنين

ليه السيجار و كوباية العناب

ليه التصوير مش الرسم

ليه عزلنا من بيتنا القديم

ليه الاهلى بيكسب

ليه السما زرقا و الرمله مرمله

ليه لو رسمت ست عريانه يبقى فن و لو صورتها تبقى دعاره

ليه الناس بتقول أمين من غير ماتفكر

ليه لازم المدير يكون مبسوط

ليه القهوة فى كوبايه مش فنجان

ليه جوجل بيستهبل و بيمسح المدونات

ليه بنثق فى حد عمرنا ماشوفناه

ليه ظالمين ابليس مع انه غلبان مقارنة بنفسنا

ليه البلد دى مُرها احلى من الشهد

ليه بكره كُريم مش فاضى

ليه عمرى ما شربت شاى بالبن

ليه القله بتعمل صوت و احنا بنشرب منها
Post a Comment