Tuesday, November 18

بعد اذنك ممكن كلمتين

بعد اذنك ممكن كلمتين
اممم مش عايزه تسمعينى
طيب انا هاقولهم حتى لو مش مش عايزه تعبرينى
ماهو انتى هاتسمعينى هاتسمعينى
انهارده ولا بكره هاتسمعينى
اقفى هنا استنينى
اقفى بدل ما اعلى صوتى و افضحك زى مافضحتينى
و اقول عليكى كلام زى اللى قلتيه لهدى و محمد الشربينى
يوم ماسرحتى بيهم و فهمتيهم انى كنت اعرفك
ضحكتى عليهم و قلتى انى بأستلطفك
صورك خيالك انى ممكن اجاريكى فى لعبتك
و اركب معاكى فى مركبك
انا مارضتيش العب معاكى و اعذبك

قلت بنت صغيره فرحانه بجمالها و قُصة شعرها
لكن تيجيبى فى سيرتى و تعبطى
و تقولى على لسانى كلام مقولتوش و فيا تشبطى
و تحكيلهم حكاوى عنى و عنك و تلخبطى
و تقولى انك بتأمرينى و تتشرطى

حكاياتك زيك متشقلبه و معفرته
كنتى فاكرانى ورقه بيضا متظبطه علشان تبدائي فيها شخبطه
لا اصحى من نومك دا انا كتبت كتب قبلك تجبيلك لخبطه

اسف على الأزعاج بس طظ فيكى
اوعى يا حلوه تفتكرى انى هاندم فى يوم عليكى
اوعى تفتكرى انى هافتكرك و اتصل بيكى

ماتفتحيش بقك و اسمعينى
استنى لما أسالك و تجاوبينى
و قبل ما يسبق كدبك سؤالى قوللى
انا حاولت ابوسك و انتى منعتينى
انا حاولت احضنك و انتى صدتينى
انا حاولت اقرب منك و انتى زقتينى
دا انا كنت قطعت شفايفى و ايديا
و كسرت رجلى و خزقت عينيا

دلوقتى بتعيطى

عيطى عيطى , فاكرانى مصدق دموعك
فاكرانى هارحمك علشان سواد عيونك

يلا اجرى العبى مع اللى فى عمرك و اوعى تلعبى تانى مع قلب مهجور
عَشش فيه الغرور
يبات الليل وحيد بس مسرور

حاله شعريه لا اساس لها من الصحه
Post a Comment