Thursday, November 12

بتوحشينى

ايه اللى بيعجبك فيها يا أيمن؟
ينظر لى ثوانى و كأنه يتعجب من تساؤلى !! فمثلى لا يجب ان يسأل مثله تلك النوعيه من الأسئله !! الا يرى كما هى جميله !! بل انها أجمل بنت فى المدرسه كلها حتى انها أجمل من البنت الحمرا اللى مامتها بتلبس مايوه فوق الشورت و تفضل تتنطط مع البنات فى المدرسه !ماما بتقول عليها أوكرانيه
,هى اوكرانيه يعنى ايه يا بابا ؟
أوكرانيه يعنى بلدها أوكرانيا
, طيب هم ليه شعرهم أحمر ؟
احنا شعرنا اسود علشان احنا من مصر هم شعرهم احمر علشان هم من أوكرانيا , كل بلد لها لون شعر
طيب ليه ماما بتلون شعرها ؟ هى مش بتحب مصر ؟ لا يا حبيبى ماما بتحب مصر بس هى بتحب شعرها اكتر من مصر
لينا و مامتها بيحبوا مصر ,لينا عمرها ما لونت شعرها !! .... يسكت قليلا ثم يعاود التساؤلات :بابا هو عمو حازم ليه ماعندوش شعر !! هو مصرى ؟
ايوه يا حبيبى مصرى بس هو من كتر حبه لمصر شعره وقع !! شفته بيشد شعره ازاى فى الماتشات !! العصبيه و الزعيق بيوقعوا الشعر
امال ازاى ماما عندها شعر !! هى على طول بتزعق
.....
بابا ؟
عايز ايه يا أيمن ؟
ماما هتكون معندهاش شعر زى عمو حازم ؟
ايوه يا حبيبى بس متقولهاش انى قلتلك
انا عمرى ماهحب مصر علشان يفضل عندى شعر, بابا بابا لينا اهى هناك نازله مع مامتها و بابها
بس يا ايمن احنا قلنا ايه !! مش عايزين حد ياخد باله اننا واقفين هنا , دخل رأسك جوه الشباك و اقعد و شوفها من بعيد
يجلس أيمن و قد بدت عليه سعاده غامره هاهو يرى حبيبته لينا بعد أسبوعين منذ ان توقفا عن الذهاب للمدرسه بسبب ذلك الغبى التخين حسام اللى كان عيان و برضه جه المدرسه و بعدين قفلوا المدرسه كلها بسببه!! غبى و تخين !! انا لما أشوفه تانى هضربه فى كرشه الكبير لحد ما اخليه زى الكوره المفسيه !! لينا اصلا المفروض تكون فى فصل لوحدها ,احنا لما نتجوز انا هاعملها فصل لوحدها, مش عارف لو بابا مكنش رضى يجبينى هنا كنت عملت ايه !! ممكن يكون سمعينى و انا بتكلم فى التليفون مع كريم و ياسر علشان نهرب و نروح المدرسه سوا, لا أكيد هو علشان بابا بيحبيى انا مصعبتش عليه
ممكن نروح بقى !! خلاص يا سيدى شوفت لينا , يا ريت نذاكر بقى و نركز فى شويه فى تمارين النادى علشان انا عايز كمان كام سنه تاخد كل البطولات و تبقى أحسن واحد فالدنيا كلها !! ولد يا أيمن !! يا واد انت مركز فين !! خلاص يا حبيبى راحو بعيد ! يلا بينا على البيت
يهز الطفل الصغير رأسه موافقا و قد تهللت أسارير وجهه بضحكه رائعه
Post a Comment