Monday, May 23

إحنا مش عسكر عندكم - إحنا مش خايفيين منكم


نتيجة اتباع الإعلام المصرى نفس سياستة القذرة و نتيجة نفاقه للمجلس العسكرى قرر المدونين المصريين تخصيص يوم 23 مايو لنقد المجلس العسكرى حتى لا يشعر انه فوق الشعب
#NOSCAF





هى الثورة قامت نتيجة ايه ؟


جهل , فساد , ظلم , قتل , إهانة , خيانة , توريث , فقر




عزيزى المجلس العسكرى فتح مخك و ركز معايا علشان مصلحتك و مصلحتى و مصلحة مصر , سيبك من ان الجيش و الشعب ايد واحده علشان انا و انت عارفين انك يوم 28 يناير اول لما نزلت الشارع اول حاجه عملتها انك ضربت الشعب و لما اتحرقتلك كام عربية و حسيت ان شوية العيال اللى مفيش فى ايدها سلاح  ممكن تضيع هيبتك قلت احنا مع مطالب الشعب ! ماشى




لما كنت بتتفرج علينا و احنا بنتقتل فى الميدان و طايراتك بتطير فوقنا و عامللنا إرهاب على أمل اننا نخاف و نجرى , برضه فضل الشعب الطيب يقول الجيش و الشعب ايد واحده . ماشى




يا مجلس .. ركز معايا ارجوك : الثورة دى قامت على نظام بوليسى بيبنى نفسه من عشرات السنين , النظام دا كان اكبر و أقوى من الجيش !!! ايوه مش معنى انك معاك سلاح دا يخليك اقوى , لأن برضه احنا الأتنين عرفيين انك يادوبك بتحمى المناطق اللى شوارعها مرصوفه و انك ماتقدرش تطلع منطقة زى أسطبل عنتر و الحل الوحيد انك تضربها بالطيران و دا برضه ماتقدرش تعمله , النظام اللى وقعته الثورة دى 5 اضعاف عدد الجيش و يمكن اكتر .. و برضه وقع لأنه كان مغرور و كان وصل لمرحلة من " الشيخوخه " خليتها يفتكر انه اذكى من الجميع , حطوا ايدكم فى ايد الناس بجد , و نضفوا البلد بجد



لو عايز نصيحه يا مجلس : اول حاجه تعملها انك تنضف وسائل الإعلام " ماتفرحش بالنفاق " علشان صدقنى المره الجايه لو قمنا اول حاجه هنعملها اننا هنضفها بإيدينا , زى ما دخلنا أمن الدولة و طلعنا اللى جواه هندخل الجرايد الحكوميه و التيليفزيون و نجيبه الأرض, احسن كتير اننا نبتدى على نضافه بدل ما نكمل على القذارة اللى موجودة دلوقتى




كلنا عارفين انكم مش عارفين تتصرفوا  و انكم مره واحد اتحملتم مسئولية البلد , و دا مش عيب ! محدش فينا بيفهم فى كل حاجه و إحنا مش بنحاول نضغط عليكم , تخلصوا من النظام القديم بأكمله و إياكم و إهانتنا لأن فيديو او صورة واحدة لعسكرى جيش و هو بيحط رجله على رأس واحد من شرفاء البلد هتضيع صورة الجيش بالكامل,  مش انتوا بس اللى عارفين مصلحة البلد و مش انتوا بس اللى بتفهموا , و مش انتوا بس اللى أقوياء الجيش لحد دلوقتى فى نظرنا كبير  بلاش تصغروه فى عين الشعب




الناس مش حاسه بالتغيير , العالم كله بيشهد باللى احنا عاملناه و الإعلام القذر  اللى كان بيطبل للكلاب قبل الثورة بيطبلكوا دلوقتى و بيشبع عند الناس الإحساس بالندم على الثورة






الثورة دى دعتلها الطبقة المثقفه و شارك فيها كل أطياف الشعب بنسبة تقريبا 20% و الـ 80% نزلوا اتصوروا جمب الدبابات ... لكن الثورة الجاية هتكون ثورة جوع طول ما انتم مستمرين فى سياسة عدم الشفافية و الفوقية , صارحوا الناس بالحقيقة و خلوهم يتحملوا المسئولية بلاش تخوفوهم




إحنا مش عسكر عندكم - إحنا مش خايفيين منكم - هتحترمونا هانحترمكم - مش هاتحترمونا متزعلوش مننا


انا نازل يوم 27 مايو
Post a Comment